「識」懷

全文作畢於二零一一年七月十四日，但卻一直缺了一個標題，所以發了文又收回。到今日，似乎終於徵得一個合格的標題，謹此刊出。

記性好的讀者，應該記得Sophy、Maggie、Serena 的幾個名字，是杜撰的；而Sophy，代表了我欣賞的一群人的一個投影。最後我覺得我的人物篇並非是寫得那麼好，最終於八月擱筆。

~~~~~~~~~~

今日，我如常地進入Xanga 的世界，而Maggie 那篇文章的標題，吸引了我的注意，所以，我便決定先閱讀她的那一篇。

>>>>>>>>> 

「懷舊糖蔥餅

七月十一日 星期一

老伯伯親切的微笑又把我拉進了回憶的世界。我還清楚的記得，在三年前的某天，我們「四姊妹」在這種分享著兩塊糖蔥餅。我們不只在分享糖蔥餅，還在同時分享著老伯伯的微笑。我們不是沒有錢買多一點，而是愛分享的那一種感覺。當年我說過，一塊糖蔥餅是通往童年的鎖匙；而到了今日，一塊糖蔥餅竟成了我通往三年前那個寒冷晚上的道路。我口中吃著的是糖蔥餅，但我心中所咀嚼的，卻是一段段的回憶。

~

當年會考成績較好的我毅然進了恆商，希望換取更燦爛的未來；但我卻放棄了與這群朋友在舊校共度AL 歲月的珍貴機會。近來大家再見面時，交談已經流於表面。大家之間彷彿多了一道心牆：遺憾的是，那道牆並不是由糖蔥餅組成的，那一道牆是由堅固的石頭，花上了兩年的世界建造的。我想念的，是從前的自己，是從前的每段關係，可惜我已經回不了過去；當日為我帶來歡樂的糖蔥餅，今日竟然成了催淚劑。」

<<<<<<<<<< 

看著這段文字，我想起了以前的自己，所以我決定了找Maggie在翌日去Café 一同用膳。我知道她愛貓，所以我刻意把她帶到「阿貓地攤」，希望在這一個相對舒適的環境，可以讓她盡訴心中情。

~

來到了阿貓地攤，才發現老闆遲到了，我們只得在門口靜候。而同樣在等待著的，則明顯是一個熟客，因為她清楚地知道每一隻貓的名字。在等候的過程之中，Maggie 則顯得有點抑鬱，但那不是不耐煩。我知道她仍然被那件事困擾，因此未露笑顏。

~

在進Café 時，愛貓的她用手輕撫迎面而來的貓兒，與此同時，她的心情好像放鬆了不少。我就知道，我沒有選錯地方了。

~

選好餐之後，Maggie 的第一句竟然是：「係中化口試，我係用『只能陪你一程』的概念來考既，仲A埋，但我竟然學唔到作者那種放得開的態度。」

~

我苦笑著說：「甚至可以講一句，我同妳係因為這篇文章而識既，不過我地都做唔到那一種豁然。不過，其實連作者本人都係做唔到；如果妳有細心咁睇，妳就會發現，作者對長期持續的友誼仍然有一種憧憬，一種期盼。所以我地都應該容許自己仍然有期盼。」

~

Maggie 似乎已經早已預備了一段心底話，所以沒怎回應我的話。「我發現當一個人提早離開咗一間學校，好似所有野都keep唔到咁。可能係大家無真正交心過啦，又或者係我太敏感，但係我的確再feel 唔到佢地想同我做朋友既感覺。有一次gathering，我發現咗因為大家的圈子唔同，連話題都已經不再相同，感覺好疏離。我心諗，其實我係度同唔係度，又有咩分別呢？唉，但係我真係無辦法，加上我又唔係真係咁得閒，無辦法慢慢update 番佢地近來發生的一切。我知道呢個好可能係一個藉口，但呢一種疏離感，真係令我好難受。之前有朋友生日，她們無約我；我facebook 留言俾佢地，佢地又唔理。有時我真係唔知道，係我變咗，定係佢地變咗。果一次gathering 之後，我已經唔想再約佢地，因為我真係好寂寞，好難受。或者，我真係唔識平衡自己既各個圈子啦。但我真係好唔想失去呢一班昔日的好姊妹。」她眼眶的淚珠，似乎提醒著我需要回應了。

~

轉眼之間，連我也陷進了回憶的深淵之內了。「Maggie，我給妳說個故事，好嗎？」她輕輕地點了頭。

>>>>>>>>> 

「Sophy，唔好意思呀！咁夜都要妳出來陪我。」

「唔緊要啦，我們係真正的朋友嘛。況且如果我出唔到既話，我就會叫你電話講啦。」

~

「Sophy 呀，我覺得妳拔尖之後，同舊校的朋友似乎仲keep 得好好bor，而我，唉。唔知係唔係我曾經在無意之中表現過自己自大的一面，或者係因為其他原因，甚至係我的錯覺，我覺得從我被宣佈可以拔尖的一刻，有唔少的朋友，好似對我有d敵意。動輒就會送上一句，『得啦，知你拔尖啦』。每日聽住呢d句子，我真係好難過。離開咗學校之後，我同佢地更加冇咗聯絡，但我仍然好懷念同佢地一齊捉棋、互相按摩、係classroom 之中唱波兒的日子。但係我真係覺得，大家的世界就好似分開咗咁，分開的不只是經歷，還包括彼此的友誼。」

~

「Eric Ho，無錯。係最初的日子，你或者會經歷呢一切，而到底那些敵意是真是假，其實不重要；重要既係，你覺得佢地對你有無敵意。如果係你心目中，佢地對你係有一種不滿的情緒，你就唔會對佢地好，咁佢地慢慢就會真係唔鍾意你，覺得你唔識人啦。但係如果你繼續表達對佢地的關心、興趣，最初他們或者真係會懷疑你的真誠，但時間可以證明一切，佢地一定會收到；如果唔得，就繼續試落去，直到得既一日為止。唔好同我講，你無時間，如果你真係最重視佢地，咁你一得閒，你應該係走去關心佢地，而唔係來搵我。你明唔明呀？」

<<<<<<<<<< 

九十日後

>>>>>>>>>> 

「Serena 那件事，你仲有冇事呀？」

「我而家舒服咗唔少啦，不過我做咗一件好蠢好蠢的事。」

Sophy 的面色一下子就刷白了，大驚地問道：「你做咗d咩呀？」

我像一個犯了錯的小孩子般，在Sophy 面前低下了頭：「我… delete 咗300個facebook 朋友，仲包括我唔少舊校的同學。」

~

「我真係被你激死呀！三個月前，你走來同我講，你想同舊校的同學做番好朋友；三個月後，你同我講你del 晒d 中學同學。喂呀Eric Ho，你要自掘墳墓我仲可以點幫你？我最多只可以係你死咗之後幫你買副棺材。但舊校的友誼，救唔救得番，我就講唔埋啦。你個死白痴，我點會識咗個咁傻既朋友架。你放榜返去係最後一個機會，不過你要做好心理準備。」

<<<<<<<<<<< 

「後面的故事你應該知道。我還是回了母校，為他們re-prior，我敢說我是因為愛，而不是什麼。雖然的確有人問過我：『你番來做咩。』。但係我受得住，因為我知道自己犯過錯，亦都知道大家心中或者真係有d 唔係好gur 既感覺，因為我真係一名『串友』。但係到咗最後，我都覺得自己重新有番呢一批朋友。Maggie，最少妳無好似我咁，連人地facebook 都del 埋既衝動錯事都做得出。連我呢一個罪人，最後都俾人重新接受番，Maggie妳仲擔心咩呀？」

「er…我唔知，或者我係無你既勇氣。係個次gathering 之後，我已經失去咗再約佢地的勇氣。」

~

「Maggie，妳望下呢隻貓，它的眼神係唔係好似好憂鬱，甚至帶幾分敵意？」

「無錯呀，我好少見貓會咁樣既bor。」

正當我嘗試輕撫貓兒，Maggie 阻止了我。「『唔好勉強貓貓呀！』你有無睇指示架？」

「我唔會試太耐，如果它唔鍾意，咁我就唔再理它啦。」

我先給它嗅一嗅我身上的氣味，之後慢慢地把手移過去，輕撫著貓兒。最初它的眼神還是不太友善，但它漸漸放鬆了下來，之後更向我們「微笑」。Maggie 看著它的表情變化，好像有所覺悟似的；最後，連Maggie也開懷地笑了。

*****

在社會的洪流之中，我們總免不了這種別離，甚至會認為自己同另一個朋友目前就如處身於兩個互不相交的世界。「她而家入咗U，唔識人啦。」「其實我仲好想同她做朋友架，但她好似唔想理我啦。」或者會在一對朋友的口中出現，因為大家也不明白對方深處的想法。Maggie 的朋友，或者會誤以為Maggie 已經忘記了她們；而Maggie 本身呢，卻認為在她的舊朋友的世界之中，已經再沒有一個可以讓她容身的位置；遺憾的是，彼此也不知道，對方對自己其實仍然是有一種期待、一種期望，卻選擇了一起含淚到天明。或者我們也應該試試聯絡那種昔日跟我們走過不少路途的那位，或者你會發現，事情比你想像之中要美好得多。